دئدیم … دئدی – علی آقا واحد

دئدیم ای غنچه دهن کؤنلومی قان ایله میسن
دئدی بیجا یئره عشقیمده فغان ایله میسن
دئدیم انصاف ائیله اینجیتمه منی عاشقینم
دئدی گئت، سریمی عیان ایله میسن
دئدیم آغلاتما منی سرو بویون شوقینده
دئدی گؤز یاشینی بیهوده روان ایله مسین
دئدیم آخر گوزه لیم باغ و بهاریم سنسن
دئدی سن عمرینی حسرتله خزان ایله میسن
دئدیم آز چکمه میشم گؤزلرینین حسرتینی
دئدی اؤز کؤنلونی یئر سیز نگران ایله میسن
دئدیم عشقینده اسیرم منه بس خیری نه دیر
دئدی اولده بو سوداده زیان ایله میسن
دئدیم عشق آتشی نیلر منه قورخان ده گیلم
دئدی بیچاره یانارسان نه گومان ایله میسن
دئدیم ای گول من ازلدن ده گؤزه ل عاشقیم
دئدی سن روحینی عشق ایله جوان ایله میسن
دئدیم هر گون سر کویینده دولانماقدیر ایشیم
دئدی واحد نه گؤزل یئر ده مکان ایله میسن

تورکی شعر

دیدگاهتان را بنویسید